Luns 19 de Novembro de 2018

Citas en San Sadurniño para unha “finde” de auga


 

Disque esta fin de semana volveremos ter tempo desapacible por mor dese tren de borrascas que nos está chegando pola vía do Atlántico. Andar por fóra igual non é moi recomendable, pero non pasa nada, hai oferta de lecer suficiente a cuberto: un obradoiro sobre árbores xenealóxicas organizado por ConcienciArte, o magosto da A.VV. Adiante de Igrexafeita, unha nova cita do Aldebarán-Intasa na Superliga e, ademais, tamén temos este venres a penúltima sesión do Outono agroecolóxico organizado polo Concello e a asociación A Cortiña.

Seguindo a orde cronolóxica, o primeiro evento que atopamos é precisamente o que terá lugar na Casa da Xuventude mañá ás 18.30h. dentro do Outono agroecolóxico. A Cortiña convidou á Asociación Galega de Custodia do Territorio, un ente de ámbito galego constituído en Rábade hai unha década que promove a conservación e recuperación do patrimonio natural sen renunciar ao aproveitamento do medio, senón máis ben impulsando a xestión sustentable dos recursos.

O sábado será cando se concentre o resto da oferta de ocio da que temos constancia. A partir das 17.00h., a Asociación ConcienciArte propónnos un obradoiro ben interesante no que aprederemos a recopilar e levar ao papel a nosa árbore xenealóxica.

Ademais do estudo das distintas liñas dos nosos ancestros, o taller -dirixido por Mariola Fernández- tamén servirá para interpretar episodios das súas vidas que, se cadra, marcan hoxe a nosa propia personalidade.

É importante traer xa recopilados nomes, datas de nacemento e defunción, así como aqueles sucesos de todo tipo -mortes prematuras, guerras, fillos fóra do matrimonio, abandonos, etc.- dos que teñamos constancia. Tamén é importante que eses datos se remonten polo menos tres xeneracións (avós e avoas). Apuntan no 669 705 905. As persoas socias poden participar de balde, mentres que as non socias deberán pagar 5€. A sesión desenvolverase na antiga escola de Silvalonga.

Na tarde do sábado tamén volve ao pavillón a Superliga Masculina de volei. Imos xa pola quinta xornada da liga regular e o Aldebarán-Intasa San Sadurniño recibirá a partir das 19.30h. ao CV Melilla coa intención de volver remontar na táboa tras os dous últimos pinchazos fronte ao Vecindario e o Teruel. Será vital o factor bancada que, unido á estratexia, é o grande aliado da escuadra azul para facerse forte na súa cancha. Por iso desde o clube anímase a encher o municipal, ao tempo que se mantén aberta a campaña de captación de socios e socias.

E mentres se disputa o partido de volei, en Igrexafeita comezará a tradicional celebración do magosto. O programa organizado pola Asociación veciñal Adiante arrancará ás 20.00h. coa actuación do Mago Deimi, todo un experto en ilusionismo clásico ao que el lle engade números de produción propia e moitísimo humor.

Cando remate o mago, a entidade servirá castañas asadas, sopa de cabaza, liscos e pan. O prezo para persoas socias son 2€ e 4€ para quen non forme parte da asociación. Para gozar da cea fai falla inscrición previa. O prazo remata hoxe xoves á noitiña e para apuntarse cómpre chamar aos teléfonos 696 912 975 ou 626 839 398.

Deja un comentario