Venres 16 de Abril de 2021

O conselleiro de Medio Rural visita o miradoiro da Muralla en Lousame


 

As prioridades para completar a actuación neste espazo son a sinalización e a creación de máis paneis informativos

O conselleiro do Medio Rural, José González, visitou esta mañá no concello de Lousame o miradoiro da Muralla, que recibiu unha axuda como proxecto senlleiro ao dinamizar esta zona e potenciar o turismo asociado á natureza. Nesta visita tamén estiveron o director xeral da Axencia Galega de Desenvolvemento Rural (Agader), Miguel Pérez Dubois, a alcaldesa deste municipio coruñés, María Teresa Villaverde, e o alcalde de Rianxo, Adolfo Muiños.

Así, o conselleiro salientou que unha das fórmulas para impulsar o sector agrario na nosa comunidade é levar a cabo medidas de dinamización, que permiten ofrecer novas alternativas de emprego e potenciar os recursos endóxenos do rural. Neste contexto, puxo en valor os proxectos senlleiros, pois permiten defender e promocionar os valores culturais de Galicia, actuando no fomento e promoción da cultura e na protección, conservación e difusión do patrimonio cultural.

Neste caso concreto, sinalou José González, a construción deste miradoiro nun entorno natural protexido e con materiais que respecten as condicións medioambientais convérteno nun reclamo para excursionistas e sendeiristas. Polo tanto, indicou o titular de Medio Rural, aunar sinerxías como poden ser o turismo e a natureza permiten dinamizar o rural e potenciar os valores culturais e tradicionais da nosa xeografía.

Pola súa parte, Teresa Villaverde agradeceu ao titular da Xunta a inversión realizada e explicou que os vindeiros pasos para completar o proxecto son “a sinalización e información que describa o que se vive ao chegar a este lugar tan idílico”. De feito, dende o Concello xa están elaborando un plan cun arqueólogo e un arquitecto para completar a actuación. A rexedora tamén sinalou que “dende Lousame agardamos que se siga apostando deste xeito polo rural, xa que representa unha das grandes forzas da comunidade”.

Seguidamente, o conselleiro trasladouse ao lugar de Xestoso para coñecer de primeira man as instalacións da Sociedade Agraria de Transformación (SAT) Santa Lucía. Alí, José González aproveitou para lembrar que aínda está aberto o prazo para solicitar as axudas de plans de mellora, incorporación de mozos á

actividade agraria e desenvolvemento de pequenas explotacións, achegas das que tamén a SAT Santa Lucía foi beneficiaria.

Durante a visita, o conselleiro defendeu a rendibilidade das explotacións e insistiu en que os prezos neste sector produtivo débense construír a partir dos custos de produción máis un marxe de beneficio, polo que, recalcou, é necesario prohibir as ventas a perdas a través dunha modificación do marco lexislativo estatal.

Sobre este tema, o conselleiro matizou que a Xunta está tamén a actuar pola súa parte e destacou que a estratexia de dinamización do sector lácteo vai traballar cun observatorio, que permitirá determinar os custos de produción por rango de explotación. Un estudo que tamén determinará os custos de produción noutros eidos produtivos como o vitícola ou o cárnico, entre outros.

Finalmente, o titular de Medio Rural lembrou que dende hoxe se poderán solicitar as axudas da PAC, que este ano contan cun orzamento de máis de 216 millóns de euros. Relativo a estas achegas europeas, o conselleiro reafirmou a lealdade institucional co Ministerio de Agricultura, Pesca y Alimentación e incidiu en que Galicia aportará argumentos sólidos para defender esta negociación en Europa e que se visibilice a nosa comunidade como unha potencia agropecuaria.