Xoves 22 de Outubro de 2020

O concello publica a resolución provisional da convocatoria de usos das Instalacións Deportivas Municipais


A pesar do carácter provisional, esta determinación permítelle ás entidades demandantes incorporárense de forma paulatina aos adestramentos, en función  dos usos propostos e sempre e cando presenten por rexistro a documentación requerida que se pode consultar na web https://www.coruna.gal/deportes/gl/

O concello, a través da Concellería de Deportes, publica a resolución provisional da convocatoria de usos das Instalacións Deportivas Municipais para a tempada 2020 – 2021.

Esta convocatoria pública, impulsada polo Goberno local e que se pode consultar no portal web municipal de Deportes, permite unha distribución dos usos das instalacións deportivas municipais xestionadas polo Concello baseándose en criterios de publicidade, transparencia e reparto xusto entre todas as entidades demandantes. Desde a Concellería de Deportes sinalan que hoxe se abre o prazo de alegacións de 10 días hábiles.

A pesar do carácter provisional, tendo en conta que xa comezou a tempada de adestramentos e que se causaría un prexuízo ás entidades demandantes das horas de uso no caso de demorar mais a eficacia da dita resolución, permíteselle ás entidades que así o desexen incorporarse de forma paulatina aos adestramentos, en función dos usos propostos, sempre e cando presenten por rexistro a documentación requirida na base 9.4 da convocatoria, coa advertencia de que se se presentan alegacións poden dar lugar a un cambio no reparto das horas de uso.

Na páxina web de Deportes está publicada a documentación asinada que se debe presentar por rexistro, incluído o documento de aceptación do Protocolo Covid-19 do Concello para o uso das instalacións deportivas.

Deja un comentario