Domingo 25 de Outubro de 2020

Turismo de Galicia modifica o Manual de sinalización turística de Galicia para regular a imaxe e sinalética do Camiño de Santiago


O obxectivo é unificar e harmonizar a sinalización do Camiño de Santiago por constituír un dos símbolos máis consolidados da imaxe de Galicia no exterior

O Diario Oficial de Galicia publica a orde pola que se modifica o Manual de sinalización turística de Galicia e se regula a imaxe e sinalización do Camiño de Santiago.

O Camiño de Santiago, declarado Primeiro Itinerario Cultural Europeo polo Consello de Europa e Patrimonio Mundial pola UNESCO constitúe un itinerario de peregrinación cunha dilatada historia de máis de 1.200 anos que, na actualidade, está a experimentar unha importante revitalización.

O pasado ano foron máis de 237 mil os peregrinos que percorreron máis de 100 km a pé ou 200 en bicicleta e esta cifra viuse incrementada no que vai deste ano en máis dun 10% sumando xa os peregrinos que obtiveron a Compostela no 2015 un total de 258.952.

Esta afluencia proxecta a imaxe de Galicia por todo o mundo convertendo á Ruta Xacobea na principal carta de presentación da nosa comunidade a nivel internacional.

Deste xeito, Turismo de Galicia ven de modificar o Manual de sinalización turística de Galicia aprobado polo Decreto 85/2012, do 16 de febreiro, engadindo un apartado correspondente á imaxe e sinalización do Camiño de Santiago.

O obxectivo é unificar e harmonizar a sinalización do Camiño de Santiago por constituír un dos símbolos máis consolidados da imaxe de Galicia no exterior.

Así, dende agora, o Manual de sinalización turística de Galicia define e delimita os elementos gráficos e diferentes aplicacións do Camiño de Santiago.

Segundo a orde, os elementos e sinais xa existentes e que non se axusten ao disposto na mesma deberán adaptarse ás súas prescricións no prazo de catro anos.

O Manual establece a vieira amarela como referencia gráfica do Camiño de Santiago contemplando a súa aplicación sobre fondo azul representando esta cor a Europa. Este símbolo adoptado, no seu día, polo Consello de Europa é a icona que identifica ao Camiño de Santiago.

Solo a orientación a dereita é aceptada pola nova orde impedindo a súa adaptación noutras orientacións. Deste xeito, incorporarase a frecha amarela como indicadora do sentido da senda convivindo o símbolo da vieira e da frecha co mesmo tamaño, cada unha delas no seu fondo cadrado. A frecha amarela con sentido direccional foi impulsada por un dos grandes impulsores da peregrinación xacobea, Elías Valiña.

Así mesmo, a modificación inclúe identificadores especiais para as rutas declaradas Patrimonio Mundial e os lugares declarados Ben de Interese Cultural.

Con esta orde a Xunta de Galicia aposta pola regularización desta sinalización, adoptando unha medida pioneira e que responde ás recomendacións elaboradas no seu día polo Consejo Jacobeo.